Ապրիլ
«Հրաշալի յարութիւն» ժողովածու
Ապրիլ ամիս…։ Կը մանկանան աչուըներս
Մանկութեան հետ տերևներուն, սիւքերուն…
Օդին, հողին և հոգւոյս մէջ ի՜նչ աղերս,
Խորին աղերս մը կայ թրթռուն, ծաւալուն։
Պատուհանէս՝ պարտէզներու վրայ բաց,
Արև, անդորր ու թարմութիւն կը շնչեմ…
Թիթեռնիկ մը, օդի ծաղիկ վայրահած,
Կը խոնարհի իւրաքանչիւր ծաղկի դէմ։
Երկիրն ամբողջ կախեալ պարտէզ մ՚է կարծես՝
Երկինքէն վար, ճաճանչներովն արևին…
Ծղրիդներու երգով խոտերը կ՚օրրին։
Յանկարծ ճաճանչ մ՚ալ կը մեկնի հոգիէս,
Կ՚եղբայրանայ ծառերուն հետ ու լերանց,
Կուտայ սրտիս գարունի յոյս մը վաղանց…։
