Կանթեղ
«Հոգեր» ժողովածու
Իմ սրտիս մէջ բիւրեղ կանթեղ,
Նշուլեցաւ բոցը սիրոյդ,
Եվ կանթեղին մէջ, իւղի տեղ,
Հոսեցուցի կեանքըս պուտ-պուտ։
Հոն, խորանին մէջ հոգիիս,
Ժամանակէ ի վեր անյուշ,
Գամուած է քու, ո՜վ պաշտելիս,
Քու ոսկեգիծ պատկերն անուշ։
Այդ պատկերին առջև ահա,
Որ հրեշտակի ունի անուն,
Սիրոյս կանթեղը կը մխայ
Բոցով մը փոքր ու պլպլուն։
Իմ մարմինիս թաց սպունգէն
Քամուած կեանքը, երբ որ ցամքի՝
Սիրոյս կանթեղն ալ այն ատեն1,
Լոկ այն ատեն մարի՜ պիտի։
Ծանոթագրություններ
- 1 Ատեն, ատենոք — ժամանակ, ժամանակով
