Զուարթնոց տաճարին մեջ
«Արարատեան դաշտին մեջ» ժողովածու
Այս տաճարին մէջ, ո՜վ Տէր, աղօթեցին անոնք, որ
Իրենց ցաւի ծուխին խառն՝ հրճուանքի բոց մ՚ունէին…
Իրենց մաքուր քրտինքին հետ արեան ուղխ1 մ՚ալ բոսոր
Շաղախած էր այս հիմերն ու բուրումին հետ խունկին
Կը բարձրանար անոնց հոտն ու կը սփոփէր միշտ զիրենք…
Խաղաղութիւն ամէնուն հոգիին մէջ կը տիրէր,
Եվ հաւատքով մը ամուր ու շրթներով ալ աննենգ՝
Մարդիկ քեզ, Տէ՛ր, կ՚օրհնէին, զի կ՚օրհնէի՜ր զիրենք, Տէ՛ր…
Հիմայ այստեղ ծածկուա՜ծ են դարերու փոշիով
Անոնք, որոնք հայրերուս եղան հայրերը ազատ,
Անոնք, որ հոս ատենոք2 ծնրադրեցին քովէ քով,
Խոնարհեցան, բայց նաև ուղղուեցա՜ն անընդհատ…
Մինչդեռ այսօր՝ այս փլած տաճարին շուրջ կը տեսնեմ
Տարածասփիւռ3 ամէն կողմ, մինչև հեռուն շա՜տ հեռուն,
Անոնց սերունդը ամբողջ, միշտ ծնրադիր, թախծադէմ…
Տէ՜ր, արձակէ ալ զանոնք ի սէր իրենց պապերուն…։
Ծանոթագրություններ
- 1 Ուղխ — ջրի հոսանք, առատ ջուր
- 2 Ատեն, ատենոք — ժամանակ, ժամանակով
- 3 Տարածասփիւռ — աշխարհովը մէկ ցրուած
