Երեք կոչերը
«Սեր» ժողովածու
Առտուն կանուխ՝ ո՞վ է որ
Դուռըս այսպէս կը զարնէ…
Դո՞ւն, սպիտակ ու աղուոր
Երա՛զ… կուգա՛մ, ըսպասէ՛,
Աշխարհի ծայրը մինչև,
Մինչև լուսին ու արև՝
Ո՛վ սպիտակ, վետիվետ
Երա՛զ… կուգա՜մ յետևէդ…
Ցերեկ ատեն1՝ ո՞վ է որ
Կը բախէ դուռըս այսպէս,
Ընդհատ-ընդհատ, զօրաւոր…
Ա՛հ, այո՛, դուն, դուն Պարտքն ես՝
Հրամայող, խոստացող,
Ո՛վ պարտք, որուն դող ի դող
Կը հետևիմ ես ահա
Բացած դժնէ ճամբուն վրայ…։
Իրիկուան մէջ՝ ո՞վ է որ
Կը ցնցէ դուռըս մեղմիւ…
Այս ի՞նչ ձայն է՝ դաշն ու խոր՝
Զոր կը լսեմ ես հազիւ…
Մա՛հ գեղեցիկ, Մա՛հ վսեմ,
Կը սպասէի քեզի ես
Ու հետդ ահա կը քալեմ՝
Խելոք ու լուռ, զաւկի՜դ պէս…։
Ծանոթագրություններ
- 1 Ատեն, ատենոք — ժամանակ, ժամանակով
