Առիթները
«Հրաշալի յարութիւն» ժողովածու
I
Ո՜վ կորսըուած առիթներ, իմ թռչուններս սիրելի,
Ճերմակ երբեմն ու յաճախ տենչանքի գոյն բոցավառ,
Եթերային ու մաքուր մերթ համբոյր մը ներելի,
Ամբողջական՝ երբեմն ալ՝ գիրկընդխառնում մը անճառ1:
Այնչա՛փ մօտիկ, օ՜հ, այնչափ հնարաւոր առիթնե՛ր,
Կարմիր-ճերմակ թռչուններ, պատուհանէ մտած ներս,
Սենեկիս մէջ սգաւոր դեռ չողջունած մուտքը ձեր՝
Փախաք նորէն, ձգելով ինձի իմ ցաւ-կարօտներս…։
Կը կանչեմ ձեզ այս գիշեր երկինքներէն ձեր կապոյտ,
Եկէ՛ք նորէն, օ՛հ, եկէ՜ք, սենեկիս մէջ սգաւոր.
Պիտի գիտնամ այս անգամ վճռական բառն ու ընդփոյթ2
Պիտի գոցեմ կուրծքիս փեղկը ձեր կուրծքին դէմ աղուոր…։
II
Ո՜վ առիթներ, որ կուգաք արշաւասոյր և կ՚անցնիք,
Ես միշտ պատրաստ ըլլայի, ամէն րոպէ պատրաստ միշտ՝
Թեթև ու ժիր վազելու ձեր յետևէն ու ձեզ ճիշտ
Որսի մը պէս բռնելու և զարնելու ձեզ ժանիք…
Ո՜վ ապրելու առիթներ և առիթներ խորհուրդի,
Քանիներդ էք, որ ինձի օր մ՚երևցաք անբարբառ,
Մերթ հանճարի րոպէներ, զորըս մոռցած եմ իսպառ,
Մերթ ալ ծովե՜ր հեշտութեան, ուր սիրտս դեռ կ՚ընկղմի։
Ձեզ ո՞ր ոգին քայլերուս տակ կը ստեղծէ անդադար
Եվ կը թաղէ անծանօթ դամբաններու մէջ ճղճիմ.
Ձենէ3 մէկուն նորագոյն սուգովը միշտ կը շրջիմ,
Եվ այս մահերը պզտիկ կ՚ըլլան հոգւոյս մահն երկար…։
Ծանոթագրություններ
- 1 Անճառ — անասելի
- 2 Ընդփոյթ — շտապ, արագօրէն
- 3 Ձենէ — ձեզանից
