Օհ, եթէ սէրը չըլլար...
«Սէրը տասնվեց, երեսուն եւ վաթսուն տարեկանին» ժողովածու
Օհ, եթէ սէրը չըլլար՝ ի՜նչպէս հաճոյքն, որ յաճախ
Կը դառնար շուրջս ու երբեմն ալ կարծես ինձ կը սպասէր,
Պիտի կեանքիս մէջ մտնէր, զայն ընէր գոհ ու խաղաղ…
Միայն թէ սէրը չըլլա՜ր, վախկոտ ու մութ, հիւանդ սէր…
…Անցեալին մէջ մի առ մի մարած ջահերը ահա,
Որ կրնային ինձ լոյս տալ և որոնց դէմ նետեցի
Ես մառախուղը սիրոյս ու չգիտցայ, չգիտցայ՝
Թէ բարեկամ էր հաճոյքն, թշնամի՝ սէրը ինձի…
Աչքերուս դէմ ծաղիկներ, կարմիր, կապոյտ ու դեղին,
Բուրումներով զգլխիչ1 կը բացուէին շարունակ…
Ու կ՚ուզէին, որ ճզմեմ զիրենք բերնիս, կուրծքիս տակ…
…Կը շարժի դէզը անոնց հիմայ հովէն կարօտին,
Ու կը թափի իմ վրաս, ու ես ստուերն եմ միայն,
Իմ ձեռքերուս ու գրկիս, որ միշտ պարապ կը մնան…
Ծանոթագրություններ
- 1 Զգլխիչ, զգլխել — արբեցնող, խենթացնող, արբեցնել, խենթացնել
