Կէս գիշերէն Մինչեւ արշալոյս Ես սիրեցի
«Կէս գիշերէն մինչեւ արշալոյս» ժողովածու
Ես սիրեցի, բայց ոչ ոք
Սիրածներէս գիտցաւ թէ՝
Զինքը որքա՜ն սիրեցի…
Ո՞վ կարդալ սիրտը գիտէ։
Ամէնէն մեծ հրճուանքիս,
Ամէնէն սուր վիշտերուս
Ներշնչողները, աւա՜ղ,
Զիս չեն ճանչնար այս պահուս։
Սէրըս կարծես այն գետն էր,
Որ իր հոսանքը անբաւ1
Առաւ լեռան ձիւներէն
Ու լեռը զայն չտեսաւ։
Սէրս այն դուռն էր կարծես,
Ուրկէ ոչ ոք մտաւ ներս.
Ծաղիկներով ծածկըուած՝
Գաղտնի պարտէզ մըն էր սէրս։
Ու եթէ սէրըս ոմանք
Երկինքին վրայ՝ անսահմա՜ն
Տեսան ծուխի մը նման,
Կրակն անոր չտեսան…։
.........................
Ես սիրեցի, բայց ոչ ոք
Սիրածներէս գիտցաւ թէ՝
Զինքը որքա՜ն սիրեցի…
Ո՞վ կարդալ սիրտը գիտէ…։
Ծանոթագրություններ
- 1 Ամբաւ (անբաւ) — անչափ, անհատնում
Թեմաներ
