Ես ի՞նչ անեի…
«Հրո երկիր» ժողովածու · 1916
Ես ի՞նչ անեի, քույր իմ, երբ չկար
Այլևս ոչինչ.
Ո՛չ կապույտ հոգուս թևը խելագար,
Ո՛չ կույս աչքերիդ ձյունը ամոքիչ1:
Ձեռքերդ՝ նիհա՜ր, դալկացա՜ծ2, ծարա՜վ,
Պարզել էիր դու —
Ո՞վ գիտե, արդյոք Հյուսի՞ս, թե Հարավ,
Թե՞ — դեպի ստվերն Արևի— հոգու…
Ես ի՞նչ անեի, ի՞նչ աներ հոգիս,
Որ կանչում էր Քե՜զ —
Ու Քո հո՜ւշ դարձած երազը մոգիչ3,
Երազը ձյունե, երազն — արևկե՜զ4…
Ծանոթագրություններ
- 1 ամոքիչ — ամոքող, մեղմացնող, սփոփիչ, ցավերը մեղմացնող, հանգստացնող
- 2 դալկանալ — դալուկ (դժգույն, գունատ) դառնալ, գույնը գցել, դեղնել
- 3 մոգիչ — մոգող, հմայող, թովիչ, դյութող
- 4 արևկեզ — արևակեզ, արևից կիզված՝ խանձված
