Մեռելոց
«Երեք երգ տխրադալուկ աղջկան» ժողովածու · 1913
Երեկոն անձրևոտ էր ու թաց։
Փողոցները — դատարկ, անաղմուկ։
Ու քամին էր անցնում սրընթաց
Ու տամուկ1:
Ու գիշերը իջնում էր մթին.
Երևում էին մութ հեռևում
Փողոցի կրակներն երերուն՝
Հանձնված ամոթին ու ստին։
Ու գնում էի ես համրընթաց,
Ինքս ինձ քո անունը ասում։
Հեռևում ինչ-որ մեկը խնդաց
Փողոցի անձրևոտ երազում։
Ու օրհնում էի ես իմ սրտում
Մոռացված դամբարանը քո մութ։
Մեկն ասաց, որ ստում եմ, ստում,—
Ու լսվում էր հեռվում մեկի լացն անօգուտ…
Ծանոթագրություններ
- 1 տամուկ — խոնավ. գոլորշիներով հագեցած, թաց, թրջված, ջրակալած
