Թելիկ-մելիկ առու
«Սեզամ, բացվիր» ժողովածու
Թելիկ-մելիկ առու,
Ոլունք-ուլունք մասուր…
Ատելության գալու
Անրջանքներ լազուր։
Թելիկ-մելիկ առու,
Ուլունք-ուլունք մասուր…
Տանջող տենչանք լալու,
Եվ սիրելու սարսուռ։
Թելիկ-մելիկ առու,
Ուլունք-ուլունք մասուր…
Մամուռի տակ՝ մի բուռ
Պատանության մասունք։
Թելիկ-մելիկ առու,
Ուլունք-ուլունք մասուր,
Լսեք հեռվից-հեռու
Տեսեք ի՞նչ եմ ասում։—
Չգա՞մ ձեզ պահ տալու
Ինչ որ ունեմ մաքուր,
Թելիկ-մելիկ առու,
Ուլունք-ուլունք մասուր…
