«Սարի հովի պես ամպերի փեշով…»
1902
Սարի հովի պես ամպերի փեշով
Արծըվի թևին զարկեմ ու երթա՜մ.
Ջինջ աղբյուրի պես դալուկ անտառով
Չոր տերևները գրկեմ ու երթա՜մ…
Ա՜խ, կյանքըս թոշնեց ու ցընորքներըս
Գնացին աշնան հավքերի նման,
Դու ել ծաղրեցիր վառ արցունքներըս.—
Սիրուս երազը ողբամ ու երթա՜մ…
Վարդի ու գարնան անուշիկ երգեր
Կյանքի ափերից գըլգըլա՜ն, կուգա՜ն…
Է՛հ բավական է… Ես վաղ եմ հանգել,
«Մնաք բարևս» մրմնջա՜մ, երթա՜մ…
1902
