«Արևելքից մի հավք եկավ…»
1899
Արևելքից մի հավք1 եկավ
Ոսկի հակինթ2 թևերով,—
Վառ արևի խորքից եկավ
Աշխարհով մեկ՝ ձայն տալով.
— «Ես եմ կյանքը. — կյանքն է երազ
Մեծ քնի մեջ աշխարհի.
Մարդն է ոգի, մարդն է ղողանջ
Մեծ զանգի մեջ աշխարհի»։
Եվ իմաստուն հավքը ճախրեց,
Թռավ դեպի արևմուտք.
Եվ թևաթափ լուռ մխրճվեց
Մահվան ծովում՝ սև ու սուգ…
1899, Ղազարապատ
Ծանոթագրություններ
- 1 հավք — թռչուն (բանաստեղծական)։
- 2 հակինթ — թանկարժեք քար (շափյուղա, յակինթ)։
