«Վառվում ես՝ մարմա՜նդ, մարմա՜նդ,»
«Ողջակիզվող կրակ» ժողովածու · «Առավոտ»
Վառվում ես՝ մարմա՜նդ, մարմա՜նդ,
Սրտիս մեջ դառնում ես հուր։
Վառվում ես մարմա՜նդ, մարմա՜նդ
Հրով քո՝ շարմաղ1, մաքուր։
Անբախտ եմ, ո՛րբ եմ ու խեղճ,
Ինչպես իմ երկիրը, որ —
Կորե՜լ է աշխարհի մեջ,
Լռե՜լ է՝ անտեր, անօր։ —
Ես ինչպե՞ս կանչեմ հիմա,
Որ տաս ինձ շրթերդ կաս2. —
Ախ, ինչպե՞ս կանչեմ հիմա,
Որ ձայնս լսես ու գաս…
Ծանոթագրություններ
- 1 շարմաղ — շատ մանր ծակոտիներով մաղ. փխբ. քնքուշ, նուրբ. փխբ. սպիտակ, ճերմակ, ճերմակամաշտ
- 2 կաս — կաս կարմիր` ամբողջապես կարմիր, մուգ կարմիր
