«Հնչում են խոսքերը, բառերը,»
«Ողջակիզվող կրակ» ժողովածու · «Առավոտ»
Հնչում են խոսքերը, բառերը,
Հանգերը, վանկերը բոլոր,
Երբ քաղցր կարոտդ վառել է
Սրտիս մեջ նոր սեր ու օրոր։
Սրտիս մեջ վառվել է, վառվում է
Կարոտդ անուշ ու հրկեզ —
Իսկ դուրսը հողմի պես տարվում են
Օրերը շեշտով այս երգիս։
Օրերը փրփուր են, ալիք են,
Ծփում են փրփուր առ փրփուր,
Հողմի պես թռչում է գալիքը —
Հուզվում են օրերը պուրպուր1։
Հուզվում ու ծփում են օրերը,
Ինչպես իմ երգերը բոլոր,
Երբ քաղցր կարոտդ վառել է
Սրտիս մեջ նոր սեր ու օրոր։
Ծանոթագրություններ
- 1 պուրպուր — մուգ կամ բաց կարմիր. բնստ. կարմրագույն գործվածք` զգեստ ևն. առհասարակ` կարմիր գույն
