Նայվածք մը
Ամրան տապեն ես խոնջած՝
Թավուտքի մը բյուր բյուր կայծ
Տերևներուն շուքն ինկած՝
Ո՜րչափ սիրեմ շունչն հովտաց՝
Մեղմիկ
Հողմիկ։
Արշալույսին կանուխկեկ՝
Ո՜րչափ սիրեմ՝ ոտքըս մերկ
Կոխելով մարգ ծաղկաներկ՝
Լըվացվելու գտնել մեկ
Հստակ
Վըտակ։
Երբ միայնակ ես գամ ման,
Ո՜րչափ սիրեմ կրակներս այն
Ներշնչելու սերս անձայն՝
Հոտոտելու կույսի նման՝
Քաղցրիկ
Ծաղիկ։
Երբ հովանի աստղազարդ
Ըլլա երկնից գմբեթարդ,
Որչափ սիրեմ ի սաղարթս
Երբ կը հյուսե երգ ի վարդ
Թրթռակ
Սոխակ։
Բայց ասոնք չեմ փոխեր բնավ
Մեկ նայվածքին հետ անբավ
Թե յուղարկե ինձ հեշտյավ
Իր աչերեն վառ ու սյավ՝
Լուսիկ
Կուսիկ։
Ամրան տապէն ես խոնջած՝
Թաւուտքի մը բիւր բիւր կայծ
Տերեւներուն շուքն ինկած՝
Ո՜րչափ սիրեմ շունչն հովտաց՝
Մեղմիկ
Հողմիկ։
Արշալուսին կանուխկեկ՝
Ո՜րչափ սիրեմ՝ ոտքըս մերկ
Կոխելով մարգ ծաղկաներկ՝
Լըւացուելու գտնել մէկ
Յստակ
Վըտակ։
Երբ միայնակ ես գամ ման,
Ո՜րչափ սիրեմ կրակներս այն
Ներշնչելու սէրս անձայն՝
Հոտոտելու կոյսի նման՝
Քաղցրիկ
Ծաղիկ։
Երբ հովանի աստղազարդ
Ըլլայ երկնից գմբէթարդ,
Որչափ սիրեմ ի սաղարթս
Երբ կը հիւսէ երգ ի վարդ
Թրթռակ
Սոխակ։
Բայց ասոնք չեմ փոխեր բնաւ
Մէկ նայուածքին հետ անբաւ՝
Թէ յուղարկէ ինձ հեշտեաւ
Իր աչերէն վառ ու սեաւ՝
Լուսիկ
Կուսիկ։
