Շնորհավոր տարիք
Տարվա վերջին մեջ գիշերին
Մի ձայն լսվեց երկնքից,
Թե մի հրեղեն մանուկ ծնվեց
Ժամանակի երկունքից։
Նա գալիս է, ով մանուկներ,
Հազարումեկ բարիքով,
Թեև մանուկ, բայց խելոք է,
Ինչպես մեծ մարդ տարիքով։
Մանկանց համար նա բերում է
Տեսակ-տեսակ խաղալիք,
Անուշ-անուշ մրգեղեններ,
Սիրուն-սիրուն հագնելիք,
Ձեզնից ոչինչ չի խնայիլ,
Ինչ որ ուզեք, նա կըտա,
Բայց մեծերիս՝ ուրիշ բան է,
Չի էլ նայի մեզ վրա։
Միջնորդ եղեք, ով մանուկներ,
Դուք ձեր արդար բերանով,
Որ մեծերիս էլ ընդունե,
Ձեզ չափ պատվով ու սիրով։
Ձեր սուրբ բերնով աղաչեցեք
Այս նորածին մանուկին,
Որ այս տարի նա շնորհի
Քաջ հովվապետ մեր ազգին.
Եթե նա ձեր արդար բերնով
Մեր խնդիրքը կատարի,
Այն ժամանակ մենք էլ կասենք
«Շնորհավո՜ր Նոր-Տարի»։
Յուրթ կամ յուրդ ասվում է սարվորների՝ բնակատեղին։
