Մեղուները
Տենչանքներըս, տարագնացի՜կ մեղուներ,
Ոսկի երիզ մը բանալով
Ու զանակներ անձրեւելեն
Թըռան գացին երամ երամ.
Անցան գացին դարուղիեն,
Կիսաթափանց մըշուշներու ապրշում քողքը պատռելեն
Եվ հածելեն մեջն արեւին ոսկեծաղիկ մառախուղին։
Արեւակի, սուտակներու ու զյումրյութի
Փաղփուն երանգը ծըծելով իրենց չորս դին.
Ծործորներեն, բացավայրեն
Ու ցորենի գադիշներեն անցան անդին.
Ես գետափին մոտ մընացի վարատակա՜ն,
Մելամաղձիկ երազս հըղած
Դեպ հեռավոր ծաղկաստաններ՝
Ուր թառեցան մեղուներն իմ տենչանքներուս։
Մեղուներն իմ տենչանքներուս՝
Միջօրետքի պահերեն վերջ,
Որոնց դարձին ես կըսպասեմ՝
Ուղեկորույս զակատելով։
Ահա՜ օրն ալ մըթագնեցավ,
Եվ ես ի զո՜ւր տարաժամ
Դեռ կըսպասեմ անոնց հեւքոտ ու մեղրազօծ վերադարձին։
Ա՜հ, այս ցայգուն
Պիտի անցնիմ դարձյալ Վախիս ճամբաներեն.
Ալ հափրացա՜ծ, ուշակորույս,
Գիշերներու ըմպած գինին խավարածոր,
Պիտի անցնի՜մ ես այս գիշեր՝
Երկյուղիս սեպ ճամբաներեն,
Իմ գանկիս տակ
Հույսի ոսկի բոցին անուրջն առկայծելեն։
Ալ հոգնա՜ծ եմ
Ըսպասելեն տենչանքներուս մեղրին անույշ,
Ու տարաժամ այս հածումին մեջ երջանի՜կ պիտի ըլլամ՝
Եթե թունեղ խա՜յթ իսկ բերեն
Ուղեմոլար մեղուներն իմ տենչանքներուս։
