Ես ծնվել եմ այստեղ
«Սեզամ, բացվիր» ժողովածու
Ես ծնվել եմ այնտեղ—
Զանգեզուրի զարմիկ
Բարձունքների վրա,
Վերևից եմ տեսել
Արեգակի անեղ
Ծնունդն ամենօրյա,
Վերևից եմ տեսել
Ամենօրյա կարմիր
Հոգեվարքը նրա։
Վերևից եմ տեսել
Մթին հեղեղների
Ալիքները ծաղկած,
Վերևից եմ տեսել
Ջրվեժները պղտոր
Եվ ամպերը թաղկած,
Իմ տանիքի վրա
Օրը պարզ է եղել,
Ու երկինքը միշտ բաց։
Ասուպների1 տաք-տաք
Աճյունից եմ հունցել
Շաղախն իմ տան պատի,
Եվ երկնքի փափուկ
Փեշերով եմ սրբել
Քրտինքն իմ ճակատի,
Եվ սեղանիս վրա
Անպակաս է եղել
Սերը լուսնկաթի։
Աստղերի հետ նստել—
Նիստուկաց եմ արել,
Կիսել ժպիտ ու լաց,
Աղուհաց եմ կերել
Ալեմորուս բուքի
Ու հողմի հետ մրսած,
Մութն իմ հյուրն է եղել
Ու չի տեսել երբեք
Իմ հոնքերը՝ մթնած…
Երազներիս հեռվում
Ծիրանավոր մի բախտ
Ու ծիրանի մի ծով,
Եվ գագաթներ շիկնած,
Եվ գագաթներ պատած
Նախաստեղծման միգով,
Ես քայլել եմ այնտեղ
Ուղիղ հարդագողի
Մղեղների միջով…
Ես ծնվել եմ այնտեղ—
Զանգեզուրի զարմիկ
Բարձունքների վրա,
Վերևից եմ տեսել
Արեգակի անեղ
Ծնունդն ամենօրյա,
Վերևից եմ տեսել
Ամենօրյա կարմիր
Հոգեվարքը նրա։
Ծանոթագրություններ
- 1 ասուպ — վայր ընկնող աստղ, երկնային պինդ մարմին, որ միջմոլորակային տարածություններից հսկայական արագությամբ երկրի մթնոլորտն ընկնելով շիկանում ու պայծառ լույս է արձակում
