Գաղտնաբացություն
«Ականջդ բեր ասեմ» ժողովածու · 1961
Մտերմուհիս է նաև… գիշերը։
Երբ նա՝ լանջաբաց նեգրուհու նման,
Ինձ է հանձնըվում
Ու տիրում է ինձ՝
Անվերջանալի գրկախառնումից
Ծնվում է ինքը՝ մեր արշալույսը,
Որ թուխ ու շեկ է՝
Որպես խառնածին։
Եվ օրը գրկած, որպես մանուկի,
Երբ քայլում եմ ես հոր հպարտությամբ,
Ասես լեռները, դաշտերն ու մարդիկ
Լուռ նայում են ինձ
Ու միտք են անում,
Թե այսքա՜ն տգեղ-այլանդակ հորից
Ինչպե՞ս է ծնվել մանուկն այս հրաշք…
Չանախչի Թիֆլիս · 18.XI.1959թ. 18.XII.1959թ.
