Տաճկահայերի օրհաս
Գիտո՛ւն, թո՛ղ գիրքը, ժամ չէ կարդալու,
Գեղջուկ, դու էլ թո՛ղ եզներն ու գութան,
Տեր-հայր, դադարե՛ մեռել թաղելու,
Երկունքի մեջ է մայր մեր Հայաստան…
Երկունքի մեջ է Հայաստան աշխարհ,
Մեզ պիտի շնորհե մի նոր գոյություն,
Փափաքով սպասած ամենեն շատ դար՝
Հայոց աշխարհի սուրբ ազատություն։
Մոռանանք պահ մի հին հաշիվները,
Թողնենք առօրյա անձնական շահը,
Հանե՛նք սըրտերես մեր պիղծ կըրքերը,
Հանե՛նք սըրտերես ըստըրկի ահը։
Քրիստոնյա ենք մենք և սերունդ Հայկի,
Այսքան բա՜վ է։ Է՛լ լուսավորչական,
Կամ պապադավան1 և կամ լոթրանգի2
Ազգը չի բաժնենք՝ ի սեր հայության։
Ծանըր երկունքի մեջ է Հայաստան,
Տա՛նք թեթևություն նորա ցավերին,
Նորա ծընելու գեղեցիկ մանկան,
Թույլ չըտանք խեղդել թըշնամիներին։
Նորածնի առջև բանանք մեր գանձը.
Հարուստը՝ ոսկի, ուժը՝ պատանին,
Հարսը՝ յուր փեսան, քաջը՝ յուր անձը,
Կոնդակի շանթեր՝ սուրբ Էջմիածին։
Աստված մեզ խըղճաց վերջին այս նվագը,
Բացեց մեր պառավ մոր ամուլ արգանդ,
Թե հայը մարդ է՝ կազատվի ազգը,
Թե չէ՛, Հայաստան կըլնի քարքանդ։
Ծանոթագրություններ
- 1 պապադավան — մոլեռանդ կաթոլիկներին տրվող արհամարհական անվանում։
- 2 լոթրանգի (հնացած) — լութերական։ Լյութերականությունը քրիստոնեական բողոքական դավանություններից է, ծագել է 16-րդ դարում՝ Մարտին Լյութերի ուսմունքի հիման վրա։
