Շարականներ

Վտանգիմ ի բազմութենէ մեղաց իմոց,
Աստուա՛ծ խաղաղութեան, օգնեա՛ ինձ։
Ալեկոծիմ հողմով անօրէնութեան իմոյ,
Թագաւոր խաղաղութեան, օգնեա՛ ինձ։

Ծով կենցաղոյս հանապազ զիս ալեկոծէ,
Մրրկեալ ալիք թշնամին ինձ յարուցանէ.
Նաւապե՛տ բարի, լեր անձին իմոյ ապաւէն։
Ի համբառնալ իմում առ քեզ զաչս իմ՝ օգնեա՛ ինձ, տէր։

Մեղա՜յ, Տէր, բազումողորմ Աստուած,
Մեղայ, ողորմեա՛։
Մեղա՜յ, Տէր, եւ անկանիմ առաջի քո,
Մեղայ, ողորմեա՛։

Ընդ առաւօտս կանխեցից՝
Յանդիման լինել քե՛զ,
Թագաւոր իմ եւ Աստուա՛ծ իմ։
Ընդ առաւօտս լուիցես

Մեղք իմ բազում են յոյժ,
Ծանր են քան զաւազ ծովու,
Քանզի քեզ միայնոյ մեղայ,
Ողորմեա՛ ինձ, Աստուած։

Աստուած բազումողորմ,
Խնայեա յարարածս քո,
Հայր ամենակալ, եւ ողորմեա՛։
Աստուած բազումողորմ,

Ի նեղութեան իմում օգնեա՛ ինձ, Տէ՛ր,
Որպէս երբեմն Յովնանու, եւ ողորմեա՛։
Ի յանցանաց իմոց մաքրեա՛ զիս, Տէ՛ր,
Որպէս երբեմն զմաքսաւորն, եւ ողորմեա՛։

Զանապական ըզհոգեւոր ըզգանձըն
Յապականացու կենցաղըս ծախեցի,
Այլ առ քեզ միայն պաղատիմ,
Բարերար փըրկի՛չ,

Անկանիմ առաջի քո եւ խնդրեմ զթողութիւն յանցանաց իմոց.
Մի անտես առներ, Հայր, զաղաչանս իմ։
Աղաղակեմ որպէս մաքսաւորն
Եւ հեղում զարտասուս իմ առաջի քո, որպէս պոռնիկն.

Հայր բազումողորմ, խոստովանիմ առ քեզ, որպէս զանառակ որդին,
Թող ինձ զմեղս իմ եւ ողորմեա։
Տէր, որ գթացար ի կինն քանանացի,
Գթա եւ յիս՝ ի մեղաւորս, եւ ողորմեա։